من زمان ونفسي اتكلم في الموضوع ده بس كنت مترددة وخايفة أن كلامي ميوصلش بالشكل
اللي أقصده عارفين يعني أيه حد يحبك أوي فيقتلك بالحب ده
يعني أيه حد من خوفه عليك يجرحك
ببساطة هي دي النقطة اللي عايزة أتكلم فيها
ليه كل أم عشان بتحب بنتها أوي تقتلها بالحب ده وبرضه كل أب
المشكلة اللي عايزة أتكلم فيها هي صراع بيدور جوة كل بيت أو معظم بيوتنا
صراع الحب والمادة ليه كل أم عايزة بنتها تبتدي باللي هي أنتهت بيه؟
ليه تحرمها من أنها تتعب وتبني حياتها مع حد بتحبه والتعب ده هيبقي أحسن تعب ممكن الآنسان يحس بيه
أنامش بتكلم بنظرة رومانسية ولا بتكلم علي الحب وبس لالالا الحكاية أكبر من كده
كل يوم والتاني أسمع وأشوف حكايات وتجارب أصحابي وقرايبي
عن أد أيه مامتهم وباباهم بيفضلوا الآمكانيات والمادة علي أي شئ تاني
بقت الآولوية دلوقتي للفلوس وبس أن فلان معاه كام وهيجيب أيه
مش مهم فلان ده أخلاقه أيه ولا صفاته ولا مميزاته
ليه بقينا كده؟
ليه لما نحب حد كويس أوي ومحترم ومتدين وليه مستقبل بس ظروفه المادية وأمكانياته صعبة
يترفض ويتقالنا نفس الكلام واحد بسمعه في كل موضوع مشابهة
أنتو متعرفوش مصلحتكم فين؟
أنتو رومانسين وبتفكروا بقلوبكم ومش باصين غير تحت رجليكم؟
بلا حب بلا كلام فارغ اللي بيبتدي دلوقتي صغير بيفضل صغير طول عمره؟
مين قال كده
أنا عارفة ومتأكده أن كل الكلام ده من خوفهم علينا ولآنهم عايزين يشوفونا أحسن ناس في الدنيا
وعارفين ومتأكدين أنهم شايفين الدنيا وعايشينها أكتر مننا
طيب ليه منخدش فرصتنا في الحياة ونكافح ونتعب عشان نحس بالحاجة لما نوصلها ونعرف قيمتها
أنا طول عمري مقتنعة أن اللي بيجي سهل بيروح سهل
بابا وماما ربونا علي كده
كبرت علي حكايات ماما لينا أد أيه هي وبابا كافحوا وتعبوا وأستحمله لحد ما وصله للي أحنا فيه
دلوقتي حياة والحمدلله أفضل مما تكون
وأد أيه كل يوم صعب كان بيمر عليهم كانوا بيحبوا بعض أكتر والحب ده كان بيخليهم يكملوا
الحب اللي هما بيقولوا عليه دلوقتي سذاجة ورومانسية فارغة
الحب اللي من غيره مكنوش صبره ولا أتحمله
ليه دلوقتي بقت الفلوس والامكانيات هي أهم من الحب؟
وليه أحنا كمان منكافحش مع حد كويس ومحترم ومتدين وفيه كل الصفات
والآمكانيات تيجي بعدين بالصبر والحب والآيمان بالله والنصيب
هتفضل دي أزمة بينا وبين أمهاتناطول ما هما رافضين أننا نبتدي زي ما هما أبتدوا
وفضلوا مصممين أننا نبتدي باللي هما أنتهوا بيه
مع العلم أننا مدركين أن الزمن غيرالزمن
وزمان غير دلوقتي وأن كل وقت وليه ناسه
بس ده ميمنعش أن كل زمن زي مافيه الحلو فيه الوحش
ياريت كل أم تقرب من بنتها وتفكر في راحتها بشكل تاني غير الفلوس والمستوي والآمكانيات
عمر كل دول لوحدهم ما هيحققوا سعادة بجد
|
مش عارف اقولكي ايه بجد
انتي بتفكري في نفس الموضوع اللي شاغل بالي دلوقتي
ازاي هرتبط بواحدة من غير ما يكون عندي امكانيات
لان اي واحدة اهلها لازم يفكروا في الموضوع ده
وبيعتبروا الامكانيات اهم حاجة
بجد الشباب عايزن حل
البنات ممكن الموضوع ده مش مهم كتير عندهم قصدي مش بيفكروافي الشقة والمهر والشبكة
بس الشباب بتفكرا ازاي يجيب الحاجات دي كلها لان مش كل واحد ممكن يجوز بسهولة اليومين دول