كل يوم نسمع حكايات وحوارات يكون بطلها الآول تامر حسني منها حكايات عادية ومنها حكايات مستفزة كتير وكل مرة كنت بسمع فيها أي حاجة عن تامر خاصة بحياته الشخصية وعلاقاته ماكنتش بهتم كتير
كنت بقول وأحنا مالنا أنا ليه بالاغاني والالبوم بتاعه وبسلآنه علي المستوي الشخصي لا يعنيني كثيرا
أنا بحب أسمع تامر جداا بحب أغانيه وبحب صوته وأحساسه العالي بس بدأ تامر في الفترة الاخيرة يهيس جامد جداااا في أغانيه أول ما نزل ألبوم يا بنت الايه وسمعت أغنية أعتذري معرفش حسيت بأستفزاز رهيب كلمات الاغنية بجد غبية جدا وكانت دي البداية يعني أيه لما يقول في أغنية
أعتذري للي هيجي بعدي خليه يسامحني أصل أنا خدت كل حاجة في عهدي وشوفي عهدي كان كام سنة أعتقد أن الكلام مفسر نفسه ومفهوم جدا تامر بيشير الي أيه ولما بيني وبين نفسي قولت لآ مش معقول يكون قصده زي ما فهمت
يجي تامر في الجزء اللي بعد كده ويقول لو فاكرة ياحبيبتي أن أنتي هتقدري تنسيني لآ بصي لكل حاجة فيكي أكيد هتفتكريني مفتكرش أن الكلام محتاج توضيح
وفاكرة كويس أوي أد أيه الاغنية دي اتناقشنا عليها في الجامعة أنا وصحابي واللي تقول لآ مش قصده وأنتو فهمته غلط واللي تقول لآ الكلام مفسر نفسه وفي النهاية وصلنا أن الاغنية فعلا كلامها مستفز ورخم جداا
ميمرش وقت طويل وينزل تامر بأغنية جديدة ضمن الشو الآعلامي المبالغ فيه جدا لفيلم عمر وسلمي بعنوان بهون عليكي أنا أول ما سمعت الآغنية بجد حسيت أني بسمع خناقة بين أتنين
تفضل تامر في البداية ويقول هو أنا لسة بهون عليكي لا والله ماهرجع ليكي ولو وقفتي علي أيديكي عارف أن كلامي قاسي عليكي وعمره ما يرضيكي لكن سامحيني لازم أربيكي وبعد كده العيب عليا أني عملتك واحدة وبقي ليكي لازمة
طيب والنبي ده كلام طيب الاغنية دي بقي تتصنف أيه حب ولاخناقة وصلت انه يقول أربيكي لالالالا كده بجد كتير وتامر بدأ يهيس جامد أنا مش بهاجم تامر يعني أنا لامعاه ولا ضده ولا بناقش هبوط مستوي كلمات الاغاني بصفة عامة
لآني عارفة أن في كلام أفظع من كده بكتير بس مين اللي بيغنيه لو بصينا مين اللي بيغنيه هنلاقي ناس لسة طالعة تغني عايزة تقول كلمتين يعملوا ضجة وفي ثانية يبقوا مشهورين وخصوصا اننا شعب نطلع الواحد في ثواني ونزله برضه في ثواني
لكن تامر بدأ بداية صح ومن أول ما غني أغانيه كانت جامده ولحد النهاردة منساش حبيبي وأنت بعيد وألبومه مع شيرين وبعد كده ألبومه حب وعنيا بتحبك كانوا جامدين وحققوا نجاح جااامد
ليه بقي يعتمد تامر في ألبومه يابنت الايه علي كلمات كتير هابطة ومالهاش لازمة وبدأها بأعتذري وختمها ببهون عليكي
ويا عالم اللي جاي أيه تامر من النجوم اللي ليها شعبية كبيرة جداا وفي بعض الاوقات بيكون قدوة لشباب كتير شئنا أم أبينا يعني المفروض يكون حذر أكتر من كده في أختيارته وبالرغم من ده الالبوم فيه أغاني جامدة كتير أوي وأنا شايفة أن الالبوم لو كان نزل من غير الكام أغنية دول كان هيحقق نفس النجاح
لآن في النهاية العمل الجيد بيفرض نفسه وبيستمر لكن كده بجد كتير وكتير أوي كمان
|
كويس ان انا اول واحد علشان اخد راحتي
بصي يا نور
احنا اللي بنعمل من الفسيخ شربات
مين تامر حسني ده ؟
احنا اصلنا شعب عاطفي وقلبوا طيب وبينسي أو بيتناسي بسرعه
مش ده الاخ اللي قعد مصدعنا بالاغاني الوطنيه وفي الاخر طلع هربان من الجيش وهو في السجن قال انا هخرج واعمل اغاني دينيه بس
واتعلمت من اللي فات
ولكن مين ده علشان نكتب عنه
اعتقد ان في حاجات انفع وافيد من الشخص ده اننا نتكلم عنها لانه بصراحه ومن وجهه نظري زي فقاعه الصابون والايام هتثبت كده