Sunday, April 29, 2007
وبحبك وحشتيني




عـــهـــــد
من اكتر الشخصيات اللي اثرت فيا في حياتي مش كل انسان بيبقي في ناس كده معينة محفورة جواه
عهد من اول الناس دي هي بنت اختي بس والله بحس فعلا انها بنتي انا متعلقة بيها جدا وهي كمان متعلقة بيا موووت
يمكن انا حسيت اني محتاجة اكتب الكلام ده لاني اليومين دول حسيت اني مفتقداها اوي اوي
وده يمكن بسبب ارتباط وجودها معايا بالامتحانات عهد مقيمة في السعودية بتنزل اجازات كده كام شهر في السنة وكل مرة الكام شهر دول يكونوا في الامتحانات بتاعتي ومش بس كده عهد يوم ما اتولدت اتولدت وانا في ثانية ثانوي وقبل امتحاني بيومين
ولان وشها حلو عليا جبت مجموع حلو ودخلت الكلية اللي كنت عايزاها ممكن مايكونش القسم اللي عايزاة بس مش مشكلة برضه وشها حلو عليا ومن يومها كا ماتنزل اجازة يكون فاضل شهر علي امتحاني حتي في الجامعه
ولان عهد دي اغلي بجد من عنيا
فأرتباطنا ببعض كبير اوي واول كلمة نطقتها كان اسمي ودي حاجة غالية عندي جدا ولانها مبتقعدش غير جنبي ومبتنمش غير في حضني ومبتلعبش غير معايا فكان صعب اوي تبعد عني ايام الامتحانات
فكانت بتفضل قاعدة جنبي تلعب او في كرسيها بتتفرج ع التلفزيون وكنت كل امتحانات انجح بس عشان خاطرها وعشان وشها حلو عليا
ودلوقتي ودي اول امتحانات تمر عليا وهي مش جنبي بجد حاسة ان في حاجة نقصاني
وحشتني مووووت وحشني لعبها ونومها وروحها في كل مكان في الشقة
وحشني اكلها وشربها وهدومها وحشني صوتها وهي بتنادي عليا ولهفتها لمابكون برة وارجع وتشوفني وتبقي هتجنن عشان اشيلها
عهد مش بس بنت اختي
عهودي اول فرحة تشوفها عنيا اول حفيدة لينا في عائلة بابا
انا بس حسيت اني محتاجة اتكلم معاها ولاني عارفة انها اول ما بتصحي بتدخل ع البلوج عندي
بقولها ارجعي بقي يادودو
وحشتيني بجد وحشتيني اوووووووي
كل حاجة مالهاش طعم من غيرك حتي المذاكرة مفتقداكي فيها
وقولي لماما تشغلك اغنية بحبك وحشتيني عشان انا ببعتهالك ياروح خالتو
وخصوصا لما بتقول
وكأن الوقت في بعدك واقف مبيمشيش
وكأنك كنتي معايا بعدتي ومبعدتيش
لفيت أد أيه لفيت مالاقيت غير في حضنك بيت
وبقولك انا حنيت بعلو الصوت
وبحبك وحشتيني بحبك وانتي نور عيني
ده وانتي مطلعة عيني
بحبك مووووووووووووووووووووووووووووووووت




posted by نورهان مفيد @ 10:46 PM  
34 Comments:
  • At April 28, 2007 at 3:37 PM, Blogger مـحـمـد مـفـيـد said…

    لاء لاء لاء
    صور مرات ابني كده علي النت عيني عينك
    ماشي يا نورهان عبد الله هيوريكي

    يا دودو بجد بجد وحشتينا اوي اوي
    وحشني عضك ليا وحشني ضربك فيا وحشني السهر وحشني اللعب
    وحشاني موت يا عفريته ربنا يرجعك لينا انتي وماما وبابا بالف صحه وخير وسعاده
    وملعون ابو الغربه

     
  • At April 28, 2007 at 3:49 PM, Anonymous شيرين said…

    يخرب عقلك يا نور
    بجد عهد دي بنت زي العسل
    وعايزه تتاكل اكل كده
    وحشتني موت موت موت
    ونفسي بقي تنزل علشان تقطع شعرك من ناحيه وعبد الله من ناحيه التانيه

     
  • At April 28, 2007 at 3:56 PM, Anonymous عبد الله نجم امبابه said…

    دودو يا حبيبتي
    قدام الناس كلها وقدام كل البلوجريه
    بهديكي اغنيه
    ذهب الليل
    واهداء خاص لعمتو وعمو عصام
    وانزلي بقي علشان العب معاكي

     
  • At April 28, 2007 at 9:08 PM, Blogger نورهان مفيد said…

    اسرة محمد مفيد الكريمة كلها مرة واحدة ده انا بحلم ولا ايه

    استاذي العظيم محمد مفيد
    ملعون ابو الغربة ميت مليون مرة


    شيرين
    ربنا يخليكي انتي وعهد وعبدالله لشعري كلها كام شهر ومش هيبقي في خالص
    وحمدالله ع السلامة ومتتاخريش عليا كده تاني


    نجم امبابة والدنيا كلها
    بودي
    كده بتعاكس بنتي عيني عينك
    ع العموم ذهب الليل مفيهاش حاجة بس خلي بالك بعدكدة من الاغاني احنا عيلة محافظة

     
  • At April 28, 2007 at 10:28 PM, Blogger Diala said…

    نورهان
    الله يخليها لكم و يقر أعينكم بها
    أفهم شعورك جيدا لأني عشت هذه التجربة الجميلة
    كنت قد نشرت بوست في مدونتي بإسم مملكتي السعيدة قد يعجبك

    مودتي

     
  • At April 28, 2007 at 11:46 PM, Blogger نورهان مفيد said…

    diala
    اولا شكرا انك نورتيني
    ثانيا يارب يتقبل منك كل الدعاء لها
    ثالثا انا جريت علي مدونتك وجبت البوست
    اد ايه جميل وتقريبا شعورنا واحد
    بس انتي اكتر ربنا يحميهم انا لسة عندي بنت اخت واحدة وابن اخ واحد
    وبدعي من ربنا يبقوا كتييييير اوي واشوف ولادهم بيجروا اودامي وافرح بيهم

    وعجبتني اوي هما الغد الاكثر اشراقا
    بالتاكيد عندك حق ويااااااااااااارب تكون ايامهم احسن من ايامنا ويشوفو الخير كله
    نورتيني

     
  • At April 29, 2007 at 1:56 AM, Blogger Ahmed taher said…

    الموضوع شكله عائلي يا جدعان

    ازيك يا نورهان يا اهلاوية يا اصيلة
    ربنا يخليهالك وحميها من كل سوء
    وشكلي هبتدي افكر اكلم الواد عمر عليها بس يا رب يوافق بقا انت وحظك بقا ههههه
    مبروك عل الامتحانات وعقبال النتيجة
    تحياتي لاحلى اهلاوية

     
  • At April 29, 2007 at 2:40 AM, Anonymous ميروsniper said…

    حبيبه قلب خالتو ميرو واحشاني كتيييييييير يادودو ويارب افرح بيكي واشوفك عروسة ارجعي بسرعة انتي وماما وبابا واحشاني ضحكتك اللي تسوى الدنيا واللي فيها

     
  • At April 29, 2007 at 8:43 AM, Anonymous ام عهد said…

    ازيك يانور عيونى انا مش عارفه اقول ايه على البوست التحفه ده ولاهى العظيم انا بكيت من قلبى لما قرات الكلام اللى كتباه على عهد دى مفاجاه حلوة اوى اوى اوى ربنا مايحرمنى منك ياحبيبت قلبى ويخليكى لى ولعهد ومتشكره لام عبدالله على كلامها الرقيق وبقولك يا ابو عبدالله مافيش حد بيكره الغربه قدى انا ومتشكره جدا على احساسك الجميل ياميرو
    اما بودى بقه عهد بتهديك بوس كتير جدا وبتقولك انا بحبك اوى وانت وحشتنى
    اما ماما ان انا بموت فيكى ووحشتينى خاااااااااااااالص وهموت انا وماما وننزل مصر انا ببوسك كتيييييييييييييييييير
    واخيرا يانور انا بجد عاجزه عن الكلام ربنا يخليكى لى ياقلبى
    ام عهد

     
  • At April 29, 2007 at 8:45 AM, Anonymous ابو عهد said…

    ايه الجمال دة حتت بوست جميل مووووووووووووت ومفاجاه لذيذه ياحبيب قلبى انا مبسوط اوى بالبوست دة ربنا يخليكى يانور وعقبال ماتنزلى بوست لولادك يارب
    ابوعهد

     
  • At April 29, 2007 at 11:02 AM, Anonymous هيما(شيتوس( said…

    ربنا يخليها ويرجعها بالسلامة

     
  • At April 29, 2007 at 3:25 PM, Blogger wa3d-el3yoon said…

    اجمل حاجه فى الدنيا الأطفال الصغيرين

     
  • At April 29, 2007 at 9:06 PM, Blogger نورهان مفيد said…

    ahmed taher
    طيب مش اعرف مين عمر الاول اللي هتكلمه عن بنتي
    ع العموم اكيد حظنا حلو وهيوافق

     
  • At April 29, 2007 at 9:08 PM, Blogger نورهان مفيد said…

    ام عهد
    شكرا علي ايه دي بنتي انا ولا ايه
    وبعدين دي اقل حاجة ربنا يعلم هي وحشاني اد اية وهتجنن عليها
    وارجعوا بقي هموووووووت من غيركم



    ابوعهد
    وكفاية عندي انكم مبسوطين
    ويارب يخليك اما ولادي بقي فعهودي هي اللي هتبقي تكتب عنهم بقي بأذن الله
    وحشتوووني

     
  • At April 29, 2007 at 9:13 PM, Blogger نورهان مفيد said…

    ميرو
    يارب يامروة اشوفها عروسة كده وافرح بيها هي وعبدالله يااارب
    ويارب مايحرمني منك


    هيما
    يارب ترجع بالسلامة ويسمع منك ربنا ياهيما واخبار المذاكرة ايه الشفوي قرب شد حيلك

    wa3d el3yoon
    فعلا مافيش اجمل منهم دول ملايكة وهما البراءة كلها

     
  • At April 30, 2007 at 12:35 AM, Blogger أُكتب بالرصاص said…

    ماشاء الله

    الصور استفزتني علشان اكتب
    واقول
    ربنا يحميها
    ماشاء الله

     
  • At April 30, 2007 at 1:06 AM, Blogger ياسمين said…

    الله بجد
    بوست حلو قوى قوى
    بيوضح مشاعر الخالة اللى الناس بتقول عليها برضه والدة
    انا كمان عندى بنت أختى وقاعدة فى الإمارات حاليامع امها وكان عيد ميلادها من يومين
    هى بقى عندها 14 سنة دلوقتى عقبال كدة ما تشوفى عهد قدها
    انا بحس انها بنتى رغم انى عندى بنتين دلوقتى وهم بيحبوها زى أختهم
    بحبها قوى قوى وأنا اللى مربياها وفاهماها وعارفاها
    أميرة .. مرمر
    بنتى اللى ما خلفتهاش
    بأفرح قوى لما تكلمنى على الماسنجر وتشتكى من مامتها وتقول ان ما حدش فاهمها
    دة معناه انها كبرت وبقى ليها شخصية وبتمر بمرحلة المراهقة
    مرمر كبرت وبتشتكى وعاوزة تكون مستقلة
    ربنا يقرب البعيد ويخليى عهد ومرمر لينا
    تحياتى يا ست الكل
    ومرحبا بيكى بيننا فى عالم التدوين الجميل

     
  • At April 30, 2007 at 2:16 AM, Blogger Ahmed taher said…

    يا خبر ابيض يا خبر ابيض
    انت مشعارفة مين عمر ...سبولي الطالعة دي بقا ....كده ازعل منك
    عل العموم واضح انك مختيش بالك خشي عندي تاني اول صف عل اليمين ثالث صورة عل الشمال هتلاقي صورة فوق شاب حليوه ومسمس ملكيش دعوه بيه ده محجوز من الاخر اللي هو انا لانه مجوز تاني واحد برده انا بس ابيض واسود ثالث واحد بقا ...اخوكي العمر الصغنون
    وتحياتي

     
  • At April 30, 2007 at 2:25 AM, Blogger نورهان مفيد said…

    أكتب بالرصاص
    نورتني ويارب كل الصور تستفزك عشان تنورني اكتر


    ياسمين
    يارب يخليلك أميرة وتفرحي بيها وهي عروسة يارب
    ويارب أنا اشوف عهد قدها وتكلمني وتشتكيلي وتقولي محدش فاهمني
    ياااه
    ده انا ممكن اتجنن ساعتها من الفرحة
    ويارب يخليلك بناتك وتفرحي بيهم

    ونورتيني ويارب تنوريني علي طول

     
  • At April 30, 2007 at 2:30 AM, Blogger نورهان مفيد said…

    ahmed taher
    والله انا شوفت الصورة وعجتني اوي بس افتكرت انها صورة بيبي عادي زي الصور بتاعت الاطفال متخيلتش انه ابنك

    ما شاء الله والله واكبر
    بجد ربنا يحميه ويخليهولك وتشوفه بقي حاجة كبيرة اوووي
    ويبقي عنده مدونة ويقعد يتكلم هو وعهد علي مدونتها
    أن شاء الله
    وبعدين احنا عندنا مدونة مستقلة لعبدالله بن اخويا هو اصغر من عهد
    ممكن تشوفها وتنور
    هتلاقيه علي المدونة برة اسم صميم عبدالله
    ممكن بقي يتعرف علي عمر ويبقوا اصحاب
    ولينا الشرف طبعا
    عهد وعبدالله وعمر
    كلهم بالعين ونعمل فريق بقي وكده

    ربنا يخلي ياااااااااااااااارب

     
  • At April 30, 2007 at 9:11 AM, Anonymous هيما said…

    يابختك ياعم عبدالله

     
  • At April 30, 2007 at 12:42 PM, Blogger Nouran said…

    فكرتني بوبوس ديه بنت خالي الصغيرة بس هنا بس زي ما انت بتقولي بالظبط احلى حاجة انك تحسي بالفة بينك انت وبيبي صغنن وانكوا بتحبوا بعض انتو الاتنين حب متبادل ربنا يجليهالكوا

     
  • At April 30, 2007 at 12:43 PM, Blogger Ahmed taher said…

    عهد وعبدالله وعمر
    سمعتي عن امبراطورية ميم اهي دي بقا امبراطورية عين ههههههههههههه
    احنا لينا الشرف يا نورهان
    وميرسي كتير على ذوقك وربنا يخليهوملك يا رب ... وهي زي العسل ماشا الله

    ياااااه هو على ايامهم هيكون فيه لسه مدونات ولا ايه

    يامين يا عيش
    تحياتي ليكي ودايما بوستاتك لذيذة زيك
    سلامي

     
  • At April 30, 2007 at 3:46 PM, Anonymous Anonymous said…

    ماشاء الله
    ربنا يحفظها يا رب و يحميها
    و مش يحرمكم من بعد يا رب ابدا

     
  • At May 1, 2007 at 8:20 AM, Blogger نورهان مفيد said…

    هيما
    والله ياهيما يابختنا أحنا بعبدالله وعهد
    دول اجمل هدية في الدنيا يارب عقبال ماأشوف ولادك

    ##################################

    نوران
    ربنا يخليكي يانونة ويارب يخليلك بنت خالتك وكل اللي بتحبيهم
    وماتفترقي عند حد ابداااا

    ###################################

    ahmed taher
    ان شاء تااه هتكون في مدونات
    علي ايامهم بس يارب يكون حالهم احسن بكتييير من حالنا
    وتكون مدوناتهم حلوة مش كئيبة وبتنتقد الفساد اللي في البلد كده زي مدوناتنا
    يارب تكون ايامهم كلها خير##################################

    أبيتاف
    يارب يسمع منك ومتحرمش منها العمر كله يااااااااااااارب

     
  • At May 1, 2007 at 1:11 PM, Blogger Sampateek said…

    ما شاء الله زي السكر
    ربنا يبارك فيها و يجمعكم على خير
    يا احلى خالتو في الدنيا


    شدي حيلك في المذاكرة
    علشان انت قدوة لوعد

    تحياتي

     
  • At May 1, 2007 at 1:14 PM, Blogger مداح القمر said…

    بسم الله ماشاء الله زى القمر..ربنا يخليها ويحميها
    انتى كاتبه كلام جميل اوى يا نورهان
    انا برضه عندى اولاد اختى وبنات اخويا
    لسه ح تشوفيها وهى بتكبر ادامك ح تحسى بشعور تانى خالص
    بس صدقينى حاولى تخلى بينك وبينها شىء مشترك تعمله معاكى انتى وبس وتفتكرك لما تشوف الحاجه دى او تكون ف الموقف بتاعها...وعلميها دايما زى ما بتتعلمى منها
    انا عن نفسى اتعلمت منهم كتير
    ربنا يحميها وتشوفيها ف اقرب فرصه

     
  • At May 1, 2007 at 2:53 PM, Blogger ضـوء الـقـمر said…

    بسم الله ما شاء الله
    ربنا يخليهالك يا نور يا رب وتعاكس فيكي على طول
    انا عارفه شعورك الجميل اوي ده اتجاه عهد عشان انا كمان خاله بردو وبحب بنت اختي جداااااااااا وكأنها بنتي
    ربنا يخليلك عهد يارب

     
  • At May 1, 2007 at 3:30 PM, Blogger R.R said…

    ربنا يباركلكم فيها يا نورهان
    اولاد الاخوات بيبقم فعلا زى اولادنا
    تحياتى لدفق مشاعرك

     
  • At May 1, 2007 at 10:31 PM, Blogger نورهان مفيد said…

    sambteek
    ربنا يخليكي ويخليها هي كمان ليا
    ولو ع القدوة بقي فمامتها الحقيقية احسن قدوة ليها طبعااا
    انا لسة مش حاجة عشان ابقي قدوة

    ###################################

    مداح القمر
    يااارب اشوفها في اقرب فرصة
    ويااارب اشوفها وهي بتكبر اودامي كده وتبقي عروسة زي القمر
    وفعلا بحاول يكون في بينا حاجات مشتركة يمكن لحد دلوقتي ابسط الاشياء الاغاني اللي كنت بسمعهالها لما بتيجي وهي بعيد
    بتفتكرني وتنادي عليا
    وببقي هطير من الفرحة لما مامتها بتقولي كده

    تحياتي ونورتني في اول زيارة ويارب مش تكون الاخيرة

     
  • At May 1, 2007 at 10:34 PM, Blogger نورهان مفيد said…

    ضوءالقمر
    اكيد انتي حاسة بيا لان اللي مجرب احساسه بيختلف كتير
    ربنا يخليلك ولاد اخواتك ويارب عقبال ماتفرحي كده بولادك يااااارب


    r.r
    نورتيني
    وفعلا هما اولادنا
    والله انا بقول لمامتي مش عارفة انا ممكن احب ولادي كده زي عهد وعبدالله مش ممكن حبي ليهم ميتوصفش

     
  • At May 7, 2007 at 12:04 PM, Anonymous Anonymous said…

    الصراحه اول مره ادخل مدونتك و بجد دمعت من كم الاحساس اللي كتبتي بيه البوست و ربنا يجيب عهد بالسلامه و يوفقك في الامتحانات و يخاليلك عهد و عبدالله

     
  • At June 10, 2007 at 2:32 AM, Anonymous Anonymous said…

    أنا يمكن من أكتر الناس اللي عارفة وعهد دى أية بالنسبة لعيلة مفيد ولينا أحنا صحاب نور وربنا يجيبهالي بالسلامة هي واختي الكبيرة اللي مليش أخت غيرها وحشتووووووووووووني موووووووووووووووووووت

     
  • At June 20, 2007 at 8:09 AM, Anonymous sara mohamed said…

    بجد يانور ربنا يخليكى ليها ويخليها ليكى ويجيبها ليكى بالف سلامة ولو فعلا وشها حلو فى الامتحانات انا اللى بقولها ربنا يجيبيك لينا بالسلامه

     
Post a Comment
<< Home
 
About Me
Name: نورهان مفيد
Home: cairo, Egypt
About Me:
See my complete profile
عبد الله & عهد
    دعوه فرحهم
ناس جامده جدا
اللي شرفوني
قول اللي في نفسك

نادي القرن
    نادي القرن

بصيص حديث
بصيص قديم
Template by

محمد مفيد